– न्यायालयाने ठोठावलाआरोपीस २ वर्षांचा सश्रम कारावास
लोकवृत्त न्यूज
गडचिरोली, २२ एप्रिल : सरकारी कर्तव्य बजावत असलेल्या एस.टी. बस चालकावर चाकू हल्ला करणाऱ्या आरोपीस गडचिरोली जिल्हा व सत्र न्यायालयाने दोन वर्षांचा सश्रम कारावास व २०,००० रुपये दंडाची शिक्षा सुनावली आहे. विशेष म्हणजे, सदर दंडाची रक्कम जखमी चालकास नुकसानभरपाई म्हणून देण्यात यावी, असा स्पष्ट आदेशही देण्यात आला आहे. दंड न भरल्यास सहा महिन्यांची वाढीव शिक्षा भोगावी लागणार आहे.
ही घटना दिनांक ९ मार्च २०१९ रोजी घडली. प्रविण विश्वनाथ तलांडे (वय ३९, रा. गडचिरोली) हे एस.टी. चालक म्हणून बस क्र. MH-06-C-8843 चालवत असताना आरोपी सुनिल जनार्धन कोहपरे (वय ३५, रा. गणपूर) याने आपली मोटारसायकल बससमोर उभी करून रस्ता अडवला. रस्ता मोकळा करण्यास सांगितल्यावर त्याने चालकास शिवीगाळ करत कॉलर पकडला आणि चाकूने हल्ला करत गंभीर जखम केली.
वाहक आणि प्रवाशांच्या मदतीने जखमी चालकास तत्काळ प्राथमिक आरोग्य केंद्रात व नंतर ग्रामीण रुग्णालयात दाखल करण्यात आले. यानंतर चामोर्शी पोलीस ठाण्यात गुन्हा दाखल करण्यात आला. आरोपीस अटक करून सबळ पुरावे मिळवून सत्र न्यायालयात खटला दाखल करण्यात आला.
सरकारी वकील सचिन यु. कुंभारे यांच्या प्रभावी युक्तिवादानंतर मा. प्रमुख जिल्हा व सत्र न्यायाधीश विनायक आर. जोशी यांनी आरोपीस भा.दं.वि. कलम 341, 324, 504, 506, 332, 353 अंतर्गत दोषी ठरवत शिक्षा ठोठावली.
या प्रकरणात तपास अधिकारी परि. पो.उ.नि. दिनेशकुमार लिल्हारे, कोर्ट पैरवी अधिकारी पो.नि. चंद्रकांत वाभळे, श्रेणी पो.उ.नि. शंकर चौधरी व सफौ. सागर मुल्लेवार यांनी मोलाचे कार्य केले.
(#lokvrutt.com @lokvruttnews #lokvruttnews #gadchirolinews #Maharashtra #Gadchirolipolice @gadachirolipolice #crime )
